ÁIBBAS DUOHTA! Austrálias golgá johka bajás iige vulos. Danne go dat lea nuppe bealde ekváhtora. Amma áddet? Ledjen neahtas ikte. Doppe dat čuoččui nie…

Muhtumin lea muhtin čuoččuhusat áibbas endorii, ja muhtumin fas lea váttis diehtit mii lea duohta. Go geahčat tv-ođđasiid dahje logat juoidá aviissas, de it dáidde navdit ahte doppe muitalit giellásiid dahje jallodagaid. Jus leat Interneahtas, de dáiddát navdit ahte sáhtát luohttit dieđuide mat leat doppe, muhto ii álo leat nu.

Buot aviissain ja tv-kanálain lea ovddasvástádus das ahte dan maid deaddilit ja sáddejit, lea duohta. Jus sii diehtomielalaččat muitalit juoidá man dihtet leat boastut, de sáhttet ráŋggáštuvvot. Interneahtas lea dilli earálágan. Dáppe sáhttet buohkat, sihke aviissat, stáhtaministtar, valáštallanjoavku, kránnjá ja don, almmuhit duohtaáššiid ja oaiviliid vaikke man birra.

Váldde beare?
Go du váhnemat galgá čállit Beatles birra, de fertejedje mannat girjerádjosii gávdnat dieđuid sin birra. Jurddaš man olu álkit dus lea! Go deaddilasttát moadde boalu, de gávnnat mearehis olu dieđuid miehtá máilmmi. Dasa lassin sáhtát ieš bidjat dieđuid ovdamearkka dihtii Wikipediai. Dalle sáhttet earát oahppat dus.

Interneahtta lea albma buorre áhta gávdnat ja juohkit govaid, musihka ja dieđuid, muhto ii buot sáhte geavahit viivvuheamet. Ii leat lohpi viežžat dahje geavahit musihka, govaid dahje filmmaid almmá jearakeahttá lobi sus gii lea ráhkadan dan. Go kopieret teavstta maid leat viežžan neahtas, de fertet almmuhit gos teavstta leat viežžan.

Sihkkaris gáldu?
Don leat áibbas sihkkarit geavahan Kvasira dahje Google veahkkin gávdnat dieđuid skuvlabargui. Don dáidet gávdnat čuđiid mielde dahje duháhiid mielde siidduid go ohcet. Dalle gal ii leat álki diehtit makkár siidduide galggat mannat gávdnan dihtii rivttes dieđuid! Mii lea luohtehahtti gáldu? Geat leat bidjan dieđuid nehttii? Goas dat biddjui nehttii? Leatgoson boares dieđut mat eai leat šat riekta?

Leage kritihkalaš dasa maid logat ja oainnát. Ii buot leat riekta.

Gáldu: Du bestemmer